C朗國際賽生涯首度被逐。
周五(14日)凌晨世盃外歐洲區F組，C朗拿度成為葡萄牙輸波罪人，佢喺對愛爾蘭一仗失控開肘打人，拎到國際賽生涯首張紅牌，累葡萄牙作客慘輸0比2，出線暫時Hold住。C朗呢張紅牌代價沉重，除缺席下輪出線決定性之戰外，更有可能要喺決賽周坐波監。
葡萄牙今場原本贏波就出線，佢哋亦順利控制戰局，不過愛爾蘭嘅反擊同死球非常有效，特萊柏洛特17分鐘喺角球攻勢門前頂入，呢位效力阿爾克馬爾嘅前鋒，完半場前再突破越位射成2比0。葡萄牙下半場力圖反撲，但表現沉靜嘅C朗愈踢愈燥，結果出事。
全場被嘘嘅C朗不斷同對手口角，61分鐘更喺冇波情況下，開肘打向達拉奧沙背脊令對手跌，C朗一度做出「喊包」動作諷刺對手反應誇張，球證最初只係出示黃牌，但VAR介入後改判紅牌，亦係C朗226場國家隊生涯首度被逐。葡萄牙踢少個下無力反撲，最終輸0比2完場。
C朗開肘打人被逐：https://x.com/i/status/1989088913596842451
C朗喊包手勢諷刺對手：https://x.com/i/status/1989099243928441028
輸波嘅葡萄牙仍以2分壓倒匈牙利排榜首，周日(16日)最後一戰只要主場贏包尾嘅阿美尼亞，仍可以進身決賽周，出線依然樂觀。不過，C朗今次直接拎紅牌，唔單止會缺席對阿美尼亞一戰，如果停賽2場或以上，而葡萄牙順利出線，C朗就要喺決賽周繼續停賽，影響巨大。